തിരുവനന്തപുരം: വൈദ്യുതി പ്രതിസന്ധിയിലായ സംസ്ഥാനത്തെ വൈദ്യുതി ഉപഭോഗത്തിൽ നേരിയ കുറവ്. എന്നാൽ, വൈദ്യുതി ബോർഡിനെ ആശങ്കയിലാഴ്ത്തുന്നത് പീക്ക് സമയത്തെ വൈദ്യുതി ആവശ്യകതയിൽ കുറവുണ്ടാകാത്തതാണ്. വൈദ്യുതിമന്ത്രി കെ.കൃഷ്ണൻകുട്ടി ബോർഡിലെ സംഘടനകളുമായി പ്രതിസന്ധിയെക്കുറിച്ച് ചർച്ച നടത്തി. ഉന്നതതല യോഗം നാളെ ചേരും. വൈദ്യുതി ഉപഭോഗത്തിൽ കഴിഞ്ഞ രണ്ടു ദിവസമായി നേരിയ കുറവ് രേഖപ്പെടുത്തിയിരുന്നു. 110.06 ദശലക്ഷം യൂണിറ്റായിരുന്നു ഇന്നലത്തെ വൈദ്യുതി ഉപഭോഗം. അതേസമയം, വൈകിട്ട് 6 മുതൽ രാത്രി 12 വരെയുള്ള പീക്ക് സമയത്തെ ആവശ്യകതയിൽ വർധനവുണ്ടായി. ഇന്നലെ 5728 മെഗാവാട്ടായി മാറി തിങ്കളാഴ്ച 5639 മെഗാവാട്ടായിരുന്ന ആവശ്യകത.
