കൊച്ചി: ആലുവയില്‍ ഓട്ടോറിക്ഷയില്‍ നിന്നും റോഡിലേക്ക് തെറിച്ചുവീണ കുട്ടിയെ കാര്‍ ഇടിച്ച് തെറിപ്പിച്ചശേഷം വാഹനം നിര്‍ത്താതെ പോയ സംഭവത്തില്‍ ഡ്രൈവറെ പോലീസ് തിരിച്ചറിഞ്ഞു. കാര്‍ ഓടിച്ചത് വാഹനത്തിന്‍റെ ഉടമയുടെ സുഹൃത്താണെന്നാണ് പോലീസ് കണ്ടെത്തിയിരിക്കുന്നത്. സംഭവത്തില്‍ നെടുമ്പാശേരി സ്വദേശി ഷാന്‍ എന്നയാളാണ് പോലീസിന്റെ പിടിയിലായത്. കാറിന്‍റെ ഉടമയായ രജനിയുടെ സുഹൃത്താണ് ഇയാളെന്ന് പോലീസ് പറഞ്ഞു. നേരത്തെ, കാര്‍ ഓടിച്ചത് ബന്ധുവാണെന്നായിരുന്നു രജനി പറഞ്ഞിരുന്നത്. അപകടവുമായി ബന്ധപ്പെട്ട് രജനിയേയും പോലീസ് കസ്റ്റഡിയിലെടുത്തിട്ടുണ്ട്.കഴിഞ്ഞദിവസം രാവിലെ കുട്ടമശേരിയിലാണ് ഓട്ടോറിക്ഷയില്‍ നിന്ന് റോഡിലേക്ക് വീണ കുട്ടിയുടെ ദേഹത്ത് കാര്‍ കയറി ഇറങ്ങിയത്. ഗുരുതരമായി പരിക്കേറ്റ വാഴക്കുളം സ്വദേശി നിഷികാന്ത്(ഏഴ്) ആശുപത്രിയില്‍ ചികിത്സയിലാണ്.
