തിരുവനന്തപുരം: സംസ്ഥാനത്തിന്റെ സാമ്പത്തിക രംഗത്ത് പുതിയ മാറ്റങ്ങൾ പ്രതീക്ഷിച്ച് കാത്തിരിക്കുകയാണ് കേരളം. ഉയരുന്ന തൊഴിലില്ലായ്മ, കടബാധ്യത, വിലക്കയറ്റം, അടിസ്ഥാന സൗകര്യങ്ങളുടെ പരിമിതികൾ എന്നിവയ്ക്കിടയിൽ ധനകാര്യ മന്ത്രി വി . ഡി . സതീശൻ നടപ്പാക്കാൻ പോകുന്ന പുതിയ സാമ്പത്തിക നയങ്ങളിലേക്കാണ് ജനങ്ങളുടെ ശ്രദ്ധ കേന്ദ്രീകരിക്കുന്നത്. വികസനവും ജനക്ഷേമവും ഒരുമിച്ച് മുന്നോട്ടുകൊണ്ടുപോകുന്ന ദീർഘകാല പദ്ധതികളാണ് സംസ്ഥാനത്തിന് ഇപ്പോൾ ആവശ്യം
സംസ്ഥാനത്തിന്റെ സാമ്പത്തിക അടിത്തറ കൂടുതൽ ശക്തമാക്കുന്നതിനായി പുതിയ വരുമാന മാർഗങ്ങൾ കണ്ടെത്തുകയും സർക്കാർ ചെലവുകൾ കൂടുതൽ നിയന്ത്രിതമാക്കുകയും വേണം. നികുതി സംവിധാനങ്ങൾ ഡിജിറ്റലൈസ് ചെയ്യുക, സർക്കാർ സേവനങ്ങൾ കൂടുതൽ സുതാര്യമാക്കുക, നിക്ഷേപ സൗഹൃദ അന്തരീക്ഷം സൃഷ്ടിക്കുക തുടങ്ങിയ നടപടികൾ കേരളത്തിന്റെ സാമ്പത്തിക രംഗത്ത് വലിയ മാറ്റങ്ങൾക്ക് വഴിയൊരുക്കാം
യുവജനങ്ങളുടെ തൊഴിൽ പ്രതിസന്ധി പരിഹരിക്കുകയാണ് പുതിയ സാമ്പത്തിക നയങ്ങളുടെ പ്രധാന ലക്ഷ്യങ്ങളിൽ ഒന്നായി മാറേണ്ടത്. ഐ.ടി. പാർക്കുകൾ, സ്റ്റാർട്ടപ്പ് പദ്ധതികൾ, ടൂറിസം മേഖല, കാർഷിക അധിഷ്ഠിത വ്യവസായങ്ങൾ, ചെറുകിട സംരംഭങ്ങൾ എന്നിവയ്ക്ക് കൂടുതൽ സാമ്പത്തിക പിന്തുണ നൽകുന്നതിലൂടെ സംസ്ഥാനത്ത് പുതിയ തൊഴിൽ അവസരങ്ങൾ സൃഷ്ടിക്കാനാകുമെന്നാണ് പ്രതീക്ഷ. പഠനം പൂർത്തിയാക്കുന്ന യുവാക്കൾക്ക് കേരളത്തിൽ തന്നെ തൊഴിൽ ഉറപ്പാക്കുന്ന പദ്ധതികൾക്ക് കൂടുതൽ പ്രാധാന്യം നൽകണമെന്ന ആവശ്യവും ശക്തമാണ്.
സാമൂഹിക ക്ഷേമ മേഖലകളിലും കൂടുതൽ ജനകീയ പദ്ധതികൾ പ്രതീക്ഷിക്കപ്പെടുന്നു. സാമൂഹിക സുരക്ഷാ പെൻഷൻ വർധന, സർക്കാർ ആശുപത്രികളുടെ നവീകരണം, വിദ്യാഭ്യാസ മേഖലയിലെ ആധുനികവത്കരണം, സ്ത്രീകൾക്കും വിദ്യാർത്ഥികൾക്കും പ്രത്യേക ധനസഹായ പദ്ധതികൾ, കർഷകർക്കും മത്സ്യത്തൊഴിലാളികൾക്കും സാമ്പത്തിക സുരക്ഷ ഉറപ്പാക്കുന്ന പദ്ധതികൾ എന്നിവയാണ് പ്രധാന പ്രതീക്ഷകൾ. സാധാരണക്കാരുടെ ജീവിതച്ചെലവ് കുറയ്ക്ക്കാൻ പൊതുവിതരണ സംവിധാനവും സബ്സിഡി പദ്ധതികളും കൂടുതലായി കൊണ്ടുവരണം
അടിസ്ഥാന സൗകര്യ വികസന രംഗത്തും ജനങ്ങൾ വലിയ മാറ്റങ്ങളാണ് പ്രതീക്ഷിക്കുന്നത്. റോഡുകൾ, പാലങ്ങൾ, നഗര ഗതാഗത സംവിധാനം, ഗ്രാമീണ റോഡുകൾ, കുടിവെള്ള വിതരണം, ഹൈസ്പീഡ് ഇന്റർനെറ്റ് സൗകര്യങ്ങൾ എന്നിവയുടെ വികസനത്തിനായി കൂടുതൽ ഫണ്ട് അനുവദിക്കണമെന്നാണ് വിവിധ സംഘടനകളുടെ ആവശ്യം. നഗര വികസന പദ്ധതികൾക്കൊപ്പം ഗ്രാമപ്രദേശങ്ങളിലെ വികസന പ്രവർത്തനങ്ങൾക്കും കൂടുതൽ പ്രാധാന്യം നൽകേണ്ടതുണ്ട്
അതേസമയം, കാലാവസ്ഥാ വ്യതിയാനവും പ്രകൃതി ദുരന്തങ്ങളും ആവർത്തിക്കുന്ന സാഹചര്യത്തിൽ പ്രളയ പ്രതിരോധ പദ്ധതികൾക്കും തീരദേശ സംരക്ഷണത്തിനുമായി പ്രത്യേക സാമ്പത്തിക പാക്കേജുകൾ പ്രഖ്യാപിക്കണമെന്ന ആവശ്യവും ശക്തമാണ്.
സംസ്ഥാനത്തിന്റെ സാമ്പത്തിക വളർച്ചയും ജനങ്ങളുടെ ജീവിത നിലവാരവും ഒരുപോലെ ഉയർത്തുന്ന വികസന കാഴ്ചപ്പാടാണ് ഇനി കേരളത്തിന് ആവശ്യമെന്നാണ് പൊതുവായ അഭിപ്രായം. ജനങ്ങളുടെ പ്രതീക്ഷകൾ നിറവേറ്റുന്ന പദ്ധതികളുമായി ധനകാര്യ വകുപ്പ് മുന്നോട്ട് വന്നാൽ കേരളത്തിന്റെ വികസന ചരിത്രത്തിൽ പുതിയ അധ്യായത്തിന് തുടക്കമാകുമെന്ന പ്രതീക്ഷയിലാണ് സംസ്ഥാനത്തെ വിവിധ മേഖലകൾ.
About The Author
